Турскиот претседател Реџеп Тајип Ердоган ги демантираше тврдењата дека Турција поддржува исламски екстремистички групи во Сирија, критикувајќи ги информациите во медиумите дека Анкара ги затвора очите пред регрутирањето џихадисти на нејзина територија.
Американските весници „Њујорк тајмс“ и „Њузвик“ објавија написи во кои се тврди дека Исламската држава (ИД) може да смета на редовен прилив од регрутирани борци, кои доаѓаат од Турција.
– Турција е против секаков тероризам и терористички организации. Никогаш не сме го прифатиле терминот „исламистички тероризам“ и никогаш нема да го прифатиме. Многу е лошо Турција да се опишува како држава која поддржува тероризам, истакна Ердоган.
Аналитичарите сметаат дека стотици Турци се борат заедно со припадниците на ИД во Ирак и Сирија, оценувајќи дека групата има тајна логистичка мрежа, која дејствува во Турција.