Турскиот министер за транспорт, поморство и информации Љутфи Елван денеска изјави дека преговорите со одговорните претставници на „Твитер“ во Турција минале во добра атмосфера и бил забележан „конкретен“ напредок за серија прашања, објави турскиот весник „Сабах“.
Претставниците на американската компанија, меѓу кои, и потпретседателот Колин Кроуел, изминатава недела во Анкара разговараа со одговорните службеници од Министерскиот совет, а потоа имаа средби и во Советот за информатички технологии и Дирекцијата за телекомуникации.
Елван денеска посочи дека за време на разговорите било зафатено и прашањето за отворање на претставништво на „Твитер“ во Турција, но претставниците на компанијата посочиле дека не можат веднаш да донесат одлука за тоа прашање.
Претставниците на „Твитер“ вчера соопштија дека го отфриле барањето на турските власти за отворање на претставништво во Турција, истакнувајќи дека „инвестициската клима“ во земјата не е поволна за тоа.