Државното раководство на Србија ги повика денеска Србите на Косово да учествуваат на локалните избори на 3 ноември порачувајќи им дека „учеството во неутрални, во однос на статусот, избори е најдобриот начин да се борат за српските државни и национални интереси во јужната област“.
Претставници на косовските Срби изјавија дека конечната одлука ќе ја објават наредните денови.
Марко Ѓуриќ, советник на српскиот претседател, изјави пред новинарите по тричасовната средба со претставници на косовските Срби дека независно каква одлука ќе донесат Србите, државата ќе остане до народот во Косово.
Претседателот на Српскиот национален совет Милан Ивановиќ одби да одговори дали Србите ќе ги бојкотираат или ќе учествуваат на изборите, но истакна дека се стреми кон постигнување на заедничка позиција и согласност.