Српскиот министер за надворешни работи, Ивица Дачиќ изјави дека Србија заслужува да биде казнета поради пропусти во организација на фудбалскиот натпревар помеѓу Србија и Албанија, но дека Албанија заслужува најостра осуда поради јавно истакнување на проектот Голема Албанија.
Како реакција на изјавата на албанскиот премиер, Еди Рама дека „Албанија е модел за инспирација за иднината“, Дачиќ рече дека не му е познато дека проектот Голема Албанија е модел за иднина на регионот.
-Тоа можеби е само пуста желба на големоалбанските политичари, но за ЕУ, САД и државите во регионот е модел на минато и опасност за дестабилизација и нови судири на Балкан. Доколку Голема Албанија е модел за иднината на албанската влада, тогаш тешко на таа држава на која таквото минато и е главна цел за иднина-рече Дачиќ.
Тој додаде дека светот не смее да остане нем над оваа сериозна закана на стабилноста во регионот, бидејќи молкот може да биде сфатен како поддршка.
Е. Г.