Премиерите на Србија и Косово, Ивица Дачиќ и Хашим Тачи денеска во Брисел ќе разговараат на работна вечера со Кетрин Ештон, за напредокот во спроведувањето на бриселскиот Договор, соопшти портпаролката на високиот претставник на ЕУ за надворешна политика и безбедност, Маја Кочијанчиќ.
– Тие ќе разговараат во рамките на планот за имплементација, кој беше усвоен пред неколку недели, изјави Кочијанчиќ нагласувајќи дека тоа ќе биде можност да се направи оценка на досегашниот напредок во примената на договорот од април.
Како што пренесува Танјуг, Дачиќ изјави дека денешниот состанок со Тачи е клучен, бидејќи од него зависи што ќе содржи писмото од Кетрин Ештон и еврокомесарот за проширување Штефан Филе.
Писмото на Филе и Ештон ќе има за цел да ги запознае земјите членки на ЕУ со се што досега е постигнато со договорот меѓу Белград и Приштина.