Заврши вториот ден расправа за довербата на Владата во црногорскиот парламент. Пратениците расправата ќе ја продолжат утре, кога се очекува и да гласаат.
Денешната седница мина во знакот на остра полемика меѓу претседателот на Демократската партија на социјалистите (ДПС) Мило Ѓукановиќ и лидерот на помалиот партнер во владината коалиција Социјалдемократската партија (СДП) Ранко Кривокапиќ. Во фокусот на полемиката се најде политичката корупција во црногорскиот парламент, но и водењето полемика во деведесетите години од минатиот век.
За да добие доверба, Владата на Ѓукановиќ треба да биде поддржана од мнозинство од вкупниот број пратеници во Парламнетот, односно од 41 пратеник.
Владејачкото мнозинство има 44 пратеници, при што петмина од нив се од Социјалдемократската партија (СДП), помалиот партнер во владејачката коалиција. Лидерот на СДП Ранко Кривокапиќ во петокот најави дека неговата партија нема да го поддржи Кабинетот на Ѓукановиќ.
Премиерот Мило Ѓукановиќ побара гласање за доверба на неговата Влада на 29 декември минатата година. Во барањето за гласање доверба е посочено дека во поголемиот дел од мандатот на Владата, формирана во 2012 година, парламентарното мнозинство не му давало категорична политичка поддршка на коалицискиот кабинет, составен од неговата Демократската партија на социјалистите (ДПС) и Социјалдемократската партија.
Доколку Владата не добие доверба од мнозинството пратеници ќе бидат распишани предвремени избори, на кои според последните истражувања ДПС на Ѓукановиќ може да освои 45 отсто од гласовите.