Грчкиот премиер Алексис Ципрас доби поддршка од пратениците од партијата Сириза во врска со договорот со еврогрупата. Ципрас ги извести парламентарците и за преговорите на Грција со нејзините меѓународни кредитори.
Според извори од Владата, Ципрас побарал од своите пратеници со кревање рака да покажат дали го поддржуваат договорот со еврогрупата и мнозинството биле „за“, јави АНА.
– Резултатот ќе зависи и ќе биде проценуван во однос на начинот на кој работиме како влада. Управуваме врз основа на мандат на народот. Ќе го почекаме процесот во странските парламенти и во следните два или три дена ќе го формулираме политичкиот предлог, изјави Ципрас на крајот од состанокот.
Министрите за финансии од еврозоната одобрија 4-месечно продолжување на програмата за финансиска помош за Грција. Националните парламенти во 18 држави од еврогрупата сега треба да одобрат продолжување на програмата за помош на Атина.