Идната потпретседателка на Европската комисија, Аленка Братушек изјави дека од новата позиција во ЕК ќе продолжи да го поддржува проширувањето на ЕУ.
– Моите ставови во врска со Западен Балкан се познати. Како словенечки премиер јасно заговарав дека перспективата за членство во ЕУ на земјите од регионот е од најголема важност. Не само за регионот, туку и за цела ЕУ, истакна Братушек во изјава за „Блиц“.
Таа нагласи дека нејзиното уверување дека земјите од Западен Балкан и припаѓаат на ЕУ нема да се менува, како и дека ќе поддржи државите од регионот брзо и ефикасно да се движат кон Унијата, која ќе остане отворена за нив.
Новиот претседател на ЕК, Жан-Клод Јункер ја предложи Братушек за еден од своите клучни соработници, а Европскиот парламент наскоро ќе се изјасни за ставот на Комисијата, која ќе почне со работа во ноември.