Опозициската Нова демократија е најпопуларна партија во Грција и води пред владејачката Сириза, покажа најнова анкета спроведена од страна на компанијата „Паблик ишју“ за левичарскиот весник „Авги“.
Анкетата покажува дека мнозинството Грци се сериозно незадоволни од сегашната коалициска Влада на Сириза и Независни Грци, и за нив се изјасниле само 14 проценти од граѓаните, додека за Влада на Нова демократија биле 36 отсто од Грците.
Според анкетата, како што јави дописникот на МИА од Атина, 42 отсто Грци рекле дека лидерот на Нова демократија Киријакос Мицотакис е најдобар избор за премиер, додека 23 отсто го избрале Алексис Ципрас.
Девет од десет граѓани се изјасниле дека се незадоволни од Владата, а 51 отсто гласале во корист на предвремени избори.