На главниот мост на Ибар во Косовска Митровица од утрово се видливи поголеми сили на КФОР.
Во претходниот период на мостот имаше главно две возила на карабинерите, а од утрово има забележително повеќе возила од вообичаено, пишува Косово онлајн. Покрај КФОР, видливи се и возила на ЕУЛЕКС и полициско возило.
На мостот има и работници, кои продолжуваат со поправките започнати пред неколку дена. Главниот мост на Ибар ја дели Косовска Митровица на јужниот дел од градот, каде што живеат Албанци, и северниот дел, каде 95 отсто од населението се Срби.
Албанците постојано се обидуваа да го нападнат северниот дел на градот каде што живеат Срби преку тој мост, што доведе до конфликти, а мостот континуирано го обезбедуваат италијанските карабинери од КФОР.
Властите во Приштина најавуваат негово отворање, на што остро се спротивставуваат ЕУ, ОБСЕ, ЕУЛЕКС, КФОР и САД, наведувајќи дека оваа тема мора да биде дел од дијалогот меѓу Белград и Приштина со посредство на ЕУ.