Алијансата за иднината на Косово (АИК) на Рамуш Харадинај тврди дека нема да стане дел од Владата на премиерот Иса Мустафа, со што партијата практично ја демантираше веста на косовските медиуми дека ќе стане дел од актуелната власт, пишува приштинскиот весник „Зери“.
Од таа партија е соопштено дека АИК се обврзала дека ќе се бори против, како што се наведува, „лошото управување со државата“.
– АИК нема да биде дел од Владата на Иса Мустафа и никој не може да го спречи одржувањето на предвремени избори, се наведува во соопштението на АИК, пренесува приштинскиот весник.
Трите партии на косовската опозиција- „Движењето Самоопределување“, „АИК“ и „Иницијатива за Косово“, подолго од шест месеци ја блокираат работата на косовскиот парламент барајќи актуелната власт да поднесе оставка поради тоа што претставниците на таа власт не прифатиле да ги повлечат потписите од бриселскиот договор, кој предвидува формирање на „Заедница на српски општини“.