Брошури и други материјали во кои се опишани симптомите и последиците од хередитарен ангиоедем (ХАЕ) им беа делени денеска на присутните во ТЦ „Сити мол” на хепенингот за подигнување на свеста за ова ретко заболување.
Настанот го организраше здружението „ХАЕ Македонија” со поддршка на Град Скопје, преку јавниот повик за финансирање граѓански здруженија.
ХАЕ е ретко заболување за кое во Македонија нема третман. Претставува мутација на генот што го контролира создавањето на крвниот протеин Ц1 инхибитор, поради што се создаваат отоци на телото. Станува збор за заболување кое не може да се забележи во секојдневието, бидејќи нема никакви физички или ментални последици, освен во случај на т.н. напад, кој се манифестира со појава на отоци на разни делови на телото, внатрешно или надворешно.
Нападите можат да бидат и смртоносни, доколку се во делот на грлото, при што може да дојде до затнување на дишните патишта. Доколку не се делува, стапката на смртност може да достигне и 30 проценти.