Компанијата „Маршал“ позната по производство на засилувачи, звучници и слушалки, влегува на пазарот на смартфони со нов Андроид уред.
Маршал го претстави смартфонот Лондон, што работи на Андроид оперативен систем. Смартфонот е фокусиран на квалитетен звук, а „Лондон“ ќе биде најгласниот мобилен на светот со два звучници и хај-фај звучна карта.
Уредот, исто така, има два стерео приклучоци со посебна контрола на звук, како и М-копче на горниот дел што овозможува брз пристап до музика.
– Секогаш целиме високо и на нашите клиенти го нудиме најдоброто искуство. Кога нема смартфон фокусиран на музика, ние го создадовме. На нашите корисници нудиме најдобар музички уред, Маршал Лондон е најдоброто нешто што може да го имате во својот џеб, изјави Конрад Бергсторм, основачот и претседател на компанијата Заунд Индустрис, во чија сопственост е Маршал.
Корисниците со помош на еквилајзер ќе може да прилагодат универзален звучен профил за мобилниот, ќе можат да снимаат музика, да намалуваат бучава и да користат Ди-џеј апликација.
Маршал Лондон има 4,7 инчен екран, 2ГБ РАМ, 16 ГБ внатрешна меморија, микроСД отвор и батерија од 2.500 мили Ампер часа. На задниот дел се наоѓа камера од 8 мегапиксели, а на предниот дел камера од 2 мега пиксели.
Компанијата планира смартфонот да биде достапен во 22 држави низ светот по цена од 575 евра. Заедно со смартфонот доаѓаат и Маршал слушалки.