Полицијата во индискиот град Калкута ја користи фотографијата од обвивката на култниот албум „Еби роуд“ (Abbey Road) на групата „Битлси“ во својата кампања за поголемо почитување на сообраќајните правила.
На сликата членовите на британскиот бенд преминуваат еден зад друг на пешачки премин во улицата „Еби“, во северниот дел на Лондон.
Сообраќајната полиција на Калкута во рамки на својата кампања, чиј слоган е „Ако можат тие, зошто не би можеле и вие?“, поставила 40 билборди со познатата фотографија на „Битлси“ со цел да влијае на населението да ги користи пешачките премини.
– Сакавме нешто што ќе им го привлече вниманието на луѓето и дојдовме на идеја да ги искористиме „Битлси“ и нивната популарност. Се обидуваме да кажеме дека ако Џон, Пол, Џорџ и Ринго можат да користат пешачки премин, тогаш тоа го можат и сите останати, изјави претставник на сообраќајната полиција во Калкута.
Фотографијата на легенрадните музичари на пешачки премин ја сними Иан Мекмилан за нивниот албум во 1969 година.