Градоначалникот на Кавадарци Александар Панов денеска упати јавен повик до сите да помогнат во намалување на зголемената загаденост на воздухот во општината.
– Општина Кавадарци и Владата на Република Македонија, преку Министерството за животна средина и просторно планирање, ја информираат јавноста дека инструментите на пет мерни точики во исто толку градови во Македонија, меѓу нив и Кавадарци, во текот на 5 последователни денови од 7 до 11 јануари 2015 година, регистрираа надминување на прагот на максимално дозволена концентрација на суспендирани честички со големина од 10 микрометри за неколку пати. Овој праг освен во Кавадарци е надминат и на мерните точки во градовите Кичево, Тетово, Велес мерна станица 2 и во скопската општина Гази Баба и населбата Лисиче, стои во писмениот јавен повик од Панов.
Тој апелираше до авто превозниците, особено оние кои превезуваат руда за компанијата „Фени Индустри“ во деновите без ветер и со поголемо загадување да ги користат заобиколните патни правци околу Кавадарци, со цел да се намали загадувањето со микро честички.
Градоначалникот на Кавадарци Александар Панов потсетува и на препораките од Владата и од Министерството за животна средина на кои граѓаните се должни да се придржуваат.
