Пратеничката од ВМРО-ДПМНЕ, Лилјана Затуровска од собраниската говорница побара оставка од министерот Оливер Спасовски, поради, како што рече, тоа што, откако дошол тој на позиција криминалот цветал, а граѓаните воопшто не се чувствувале безбедни.
„Само во јануари има 520 кражби и тоа не во државата, само во Скопје, по 20 кражби на ден. Учинокот на полицијата е 2%. Граѓаните се сомневаат на поврзаноста на криминалците за делење на ќарот, финти фифти. Сомнително е што таргет на пљачките се пумпи, обложувалници, маркети, банки, по имотни граѓани… Немате контрола над состојбите, не расветливте до крај ништо, се занимавате единствено со политички мотивирани истраги. Сметам дека треба да си дадете оставка, доклку во себе имате минимум човечка одговорност. Врв на сето ова ви е случајот во Шутка, кој го премолчавте. Дали ќе имате доблест да го направите тоа, особено кога сте во игра за претседателски кандидат?“, рече Затуровска.
Спасовски во одбрана на обвинувањата на Затуровска, рече дека тоа што го кажала биле непроверени информации, односно лажни вести. Според него, откако тој седнал на министерската позиција, довербата во полицијата три пати повеќе се зголемила.
„Безбедноста се зголеми кога си замина криминалната банда во 2017. Кога дојдов на позиција, довербата во полицијата беше 23%, сега е 75%, ова се анализи на ОБСЕ. Вие бевте поддржувачи на една општо народна пљачка, а сега сакате да спречите да им се суди на тие што крадеа. Вие бевте стручњаци за делење фифти фифти, од тендери од автопати. Прашувам колку тие пари завршија во вашиот џеб? Згора на тоа креирате лажни вести.Ја злоупотребувате ситуацијата со исчезнатите и ширите паника меѓу граѓаните. Колку за информација во 2014 беа пријавени 554 исчезнати, а сега има 370″, рече Спасовски.
Затуровска не беше задоволна од одговорот, бидејќи Спасовски избегна да одговори дали ќе даде оставка од функцијата.