Започна реконструкцијата на ученичкиот дом „Крсте Петков Мисирков” во Кавадарци. Директорката Трајанка Толева денеска информираше дека работите ги изведува фирма која ја доби оваа работа на тендерот распишан од Министерството за образование.
– Од наредната учебна година ќе имаме многу подобри услови за сместување на учениците кои престојуваат во нашиот дом, додека се школуваат во Кавадарци. Токму затоа и очекуваме поголем број на ученици кои ќе учат средно училиште во Кавадарци, да сакаат да бидат сместени овде, нагласи Толева.
Таа соопшти дека реконструкцијата која чини пет милиони денари, опфаќа комплетна промена на електриката, санитариите со водоводот и канализацијата, подовите , вратите и прозорците.
Во моментов во домот се сместени шеесет ученици.
