Во полициска акција спроведена вчера попладне, при проверка на лице кое патувало со автобус од Струга за Виена биле пронајдени и запленети околу 1,7 килограми опојна дрога марихуана.
Акцијата била спроведена од полициски инспектори од СВР Охрид и полициската станица во Струга, при што биле откриени осум засебни опаковки со марихуана, залепени околу телото на 19-годишен жител на струпкото село Богојци.
Приведениот имал намера марихуаната да ја предаде на лице во Виена, притоа решавајќи се за автобуски превоз како најбезбеден и несомнителен за транспорт. Тој од Струга тргнал вчера во 16 часот, на редовната автобуска линија за Виена. На излезот од Струга, автобусот со струшки регистарски таблички бил сопрен од полициска патрола по што извршена е идентификација и преглед врз лицето. Притоа кај него се пронајдени осумте опаковки со марихуана, облепени со бела селотејп трака во пределот на стомакот. Истиот имал задача, опојната дрога марихуана, претходно набавена од Република Албанија, да ја пренесе до Виена за натамошна продажба на австрискиот нарко пазар.
Во набавката на дрогата биле вклучени уште две лица, првиот македонски, а вториот албански државјанин. Тие за разлика од сега приведениот и се добро познати на службата како сторители на казнени дела. СВР – Охрид и полициската станица од Струга преземаат натамошни мерки за нивно пронаоѓање, по што против сите три лица ќе биде поднесена кривична пријава.
Пред крајот на минатата година на истиот патен правец во близина на селото Мислешево во полициска акција беше пресечен нарко-канал што резултираше со заплена на 160 килограми марихуана набавена од Република Албанија наменета за нарко пазарот во Република Македонија и Република Австрија.