Заев се обврзува на одговорен парламент, Спасовски очекува во законските рокови да се состави Влада

Претседателот на СДСМ, Зоран Заев по конститутивната седница во Собранието порача дека тој и пратениците од неговата партија се обврзуваат да градат независен и одговорен парламент. Заев вели дека сите ќе ја изразуваат волјата на граѓаните во идните четири години.

„Нашиот парламент денеска ја одржува првата, конститутивна седница со учество на народните пратеници кои ја изразуваат волјата на граѓаните кои гласаа на парламентарните избори на 15 јули. Денес се обврзуваме да градиме независен и одговорен парламент, вистински дом на демократијата на сите граѓани на Северна Македонија“, напиша Заев.

Техничкиот премиер и нов пратеник, Оливер Спасовски, пак, очекува во законските рокови да се состави новата Влада.

„Kонститутивната седница на 10-от собраниски состав на којашто присуствувам е нов чекор кон демократскиот развој на нашата држава. Очекувам мнозинската граѓанска волја да се преточи во институциите и во уставните и законски рокови да ги добиеме новата прогресивна Влада и новиот Парламент ориентирани кон европската агенда“, напиша Спасовски.

Претходно, со 116 гласа „за“, без ниту еден воздржан, ниту пак против, беа верифицирани мандатите на сите 120 пратеници, со што е избран новиот парламентарен состав.