Коалицијата „Заедно за европска Македонија“ го повикува раководството на ВМРО-ДПМНЕ да продолжи да разговара, да размислува и да биде посветено на иднината на европска Македонија. Има уште време до референдумот, има време да се охрабрат и да одлучат да останат на зборот и на нивната повеќедецениска позиција, членството на Македонија во НАТО и ЕУ, пишува во соопштението на коалицијата „Заедно за европска Македонија“.
„Граѓаните знаат дека најдоброто за секое семејство во Македонија и за нашата татковина е токму заедништвото и сплотеноста, како и одлучноста за членство во НАТО и во Европската Унија. Раководството на ВМРО-ДПМНЕ треба да покаже одговорност и одлучност. Овој историски момент ги повикува членовите на ВМРО-ДПМНЕ да одлучат и да ја поддржат иднината на Македонија во европското семејство. Ние можеме да имаме политички разлики и да продолжиме со нашите секојдневни политички битки. Но, за иднината на Македонија сите треба да го дадат својот придонес. Не смее да има неодговорност кога е во прашање иднината на Македонија“ велат од коалицијата.
Тие повикуваат да се даде глас за европска Македонија во најсилните сојузи на светот и оти, како што пишува во соопштението, сите имаме одговорност да излезиме на гласање за да се обезбеди нашата иднина.