Двајца вработени во бифето во Министерството за внатрешни работи се позитивни на коронавирусот, дознава „А1он“. Тие последен пат на работа биле во петокот, велат вработени во МВР. Станува збор за лица кои правеле кафиња и служеле пијалаци на дел од вработените во зградата. Бифето во кое работеле е лоцирано на четвртиот кат во зграда на МВР, каде се наоѓа и канцеларијата на советникот на Наќе Чулев, за кого министерот во средата соопшти дека е заразен со вирусот.
Вработените во бифето имале и контакти со лица кои биле на раководни позиции во МВР, велат извори за „А1он“. Засега, нема информација како и дали се заразиле додека биле на работното место, како и, дали биле во контакт со советникот на Чулев додека тој одел на работа.
Со новите дијагностицирани во МВР, бројот на заразени во рамки на министерството се искачи на 41 вработен. Поради контакт со заболено лице, претходно, 170 вработени во министерството добиле решенија за изолација.
Во четвртокот пак, беа дијагностицирани четворица припадници на Министерството за внатрешни работи. Станува збор за еден вработен во Одделот за обезбедување на објекти и личности, двајца во Секторот за компјутерски криминал и дигитална форензика при БЈБ и еден во Регионалниот центар за гранични работи Север.
Засега нема информација дали претходно заразените кои работат во централата на МВР, советникот на Чулев и вработените во бифето имале меѓусебен контакт.
„А1он“ се обиде да го исконтактира техничкиот министер Наќе Чулев за овие прашања, но тој не одговори на телефонските повици. Одговори за контактите на вработените во бифето очекуваме и од Министерството за внатрешни работи.