Фирмата Land Service која ја одржуваше хигиената во трговскиот центар Сити Мол во изминативе месеци, открива дека од раководството биле терани да ги отстранат сите работници од ромска националност од одделот за храна.
Според протоколот за работа испратен по електронска пошта, а кој А1он го доби од фирмата која доби отказ без никакво образложение, Ромите не се добредојдени како работници во одделот за храна.
Најдоцна до 20.01.2013 година поради многу причини за кои што дискутиравме, да се отстранат сите вработени во food court од ромска националност, пишува во мејлот испратен од Сити Mол до фирмата Land Service.
Сопствениците на Land Service за А1 он коментираат дека до пред два дена кога по мејл добиле порака дека пробниот период завршил и престанува нивната соработка велат дека сепак задржале работници од ромска националност. Тие се зачудени и прашуваат-дали требало работниците од ромска националност да ги ангажираат само за работа во тоалетите?
Од Сити Мол појаснија дека барањето било испратено поради тоа што имало многу кражби во одделот за храна и дека сепак ова е интерно прашање на трговскиот центар. Од таму за А1 кажаа дека имало поплаки и од одделот за храна и дека не се работи за никакво етикетирање кон никого.
Според Land Service тврдат дека во одделот за храна работеле работници од сите националности.