Продолжено работно време и во саботите и неделите со цел контрола на терен во врска со заболувањето со болеста син јазик кај овците во Тиквешко, најави денеска Лазе Стамаџиев, самостоен референт при Агенцијата за храна и ветеринарство.
– Над илјада овци заболеа во Кавадаречко и Росоманско, но последниве денови ситуацијата е смирена и болеста стагнира. Сепак ги предупредуваме сточарите дека треба да бидат внимателни и да ги спроведуваат неопходните мерки за заштита. Се сумираат и крајните резултати за штетите од болеста. Последиците од синиот јазик кај кравите и козите се незначителни, информираше Стамаџиев.
Тој додаде дека се посетуваат и трлата во кои има помалку стока и чии сточари не користат субвенции, за да се видат штетите и кај овие сточари.
Должност е, посочи, на сите сточари секоја седмица да пријавуваат заболени и угинати грла или промена на бројноста на стадата кај своите матични лекари.