По четврти пат синоќа во Кавадарци се одржа манифестацијата Фестивал на вицот и шегата „Дедо цепе бурина”.
Поради дождот фестивалот наместо на плоштадот покрај големиот коледарски оган, се одржа во фоајето на домот на културата „Иван Мазов Климе“.
Златко Вузевски-Паја доби специјална награда гран-при на фестивалот. Од страна на жирито тој беше прогласен за витез на вицот и шегата.
Групата на Диме Коцевски, актер во кавадаречкиот театар, доби диплома за прво место и три илјади денари. Второ место и две илјади денари доби Панчо Арсовски. Симеон Минов се пласира на третото место и доби илјада денари. Сите наградени добија коледашки.
Фестивалот беше во организација на кавадаречкиот градоначалник Александар Панов и Советот на општината во соработка со домот на културата „Иван Мазов-Климе”.
– Еве веќа четврта година како го организираме овој фестивал и се покажа дека е тој вистински погодок, рече градоначалникот Панов.