Здруженијата на граѓани и невладини организации на Роми од Битола и од неколку македонски градови денеска го одбележаа 8 април, Меѓународниот ден на Ромите.
Во обраќањето пред присутните гости, претседателот на Здружението на Роми „Ромска ѕвезда“-Битола, Џевдет Џеловски истакна дека Ромите се интегрален дел од македонското општество и со задоволство потсетуваат на културните вредности на ромската заедница.
– За нас Ромите денешниот ден е многу значаен ден бидејќи е роденденот на сите Роми. Со гордост го прославуваме празникот на ромската заедница. Ние, Ромите, како интегрален дел од македонското општество, сме рамноправни со останатите граѓани и како секогаш така и денес ја презентираме нашата култура и традиција, истакна Џеловски.
На централната манифестација посветена на Меѓународниот ден на Ромите настапија познати музички имиња од македонската и ромската естрада, културно-уметничките друштва „Илинден“ и „Гоце Делчев“ од Битола, поети, ди-џеи и други уметници.
