ВМРО-ДПМНЕ ја оценува како срамна и недржавничка одлуката на претседателот Стево Пендаровски да не држи говор на Мечкин Камен. Портпаролката на партијата, Марија Митева на прес конференција потврди дека лидерот на ВМРО-ДПМНЕ и годинава на 2.Август ќе биде во Ташмаруништа.
„Претседателот Христијан Мицкоски традиционално ќе биде присутен во струшко Ташмаруништа. Пендаровски со овој потег ја менува 30-годишната традиција на прославата за Илинден. Но, кога некој човек нема визија за Република Македонија, не може ни да очекувате дека ќе има што да каже. И за тоа е ова резултатот. Навистина сме изненадени и ова е срамен и недржавнички потег“ – рече Митева.
Претседателот Пендаровски вчера соопшти дека годинава нема да држи говор на Мечкин Камен, а дека манифестацијата наместо во претпладневните часови ќе почне во 18 часот. На прославата ќе присуствуваат премиерот Зоран Заев и лидерот на ДУИ, Али Ахмети. Претседателот на Собранието, Талат Џафери, поради приватни обврски нема да биде дел од манифестацијата за државниот празник.