Македонскиот премиер Зоран Заев пристигна во Софија каде се сретна со премиерот на Бугарија, Бојко Борисов со кој заедно ќе претседава на годинешниот Самит за Западен Балкан во рамките на Берлинскиот процес.
„Пристигнавме во Софија на лидерскиот Самит за Западен Балкан во рамките на Берлинскиот процес, каде што оваа година домаќини се Република Бугарија и Република Северна Македонија, а самитот ќе го водиме заедно со премиерот Борисов“, напиша Заев на „Фејсбук“.
Тој додаде дека преку ваквите иницијативи се отвара ново поглавје во развојот на регионот и за остварување на стандардите кои земјите од Западен Балкан ги ставаат поблиску до членството во ЕУ.
„Денеска ќе имаме можност да дискутираме за клучните стратешки насоки за нашиот регион, за визијата за Заедничкиот регионален пазар и за Зелената агенда за Западен Балкан“, напиша македонскиот премиер.
Тој упати посебна благодарност до иницијаторот на Берлинскиот процес, канцеларката Меркел и до СР Германија, од кои, како што напиша Заев, „континуирано добиваме силна поддршка за европската перспектива на Западен Балкан и за регионалната соработка“.