ВМРО-ДПМНЕ ја поздравува препораката за започнување на преговори за полноправно членство на Република Македонија во Европската унија и смета дека со неа Европската комисија оценува дека се исполнети демократските и институционалните услови за наше целосно интегрирање во Унијата.
– Македонија е држава која е спремна да започне преговори, ги исполнува стандардите, а Комисијата го констатира тоа и го препорачува. За среќа, не се остварија сценаријата за кои раководство на СДСМ се надеваше и работеше и не им се оствари желбата Македонија да не ја добие препораката за почеток на преговорите, рече членот на ИК на ВМРО-ДПМНЕ, Илија Димовски на денешната партиска прес-конференција.
Тој посочи дека сите кои работеа на можноста Македонија да не добие препорака се разочарани и се обидуваат да го намалат значењето на препораката.
– СДСМ дури сака да го игнорира и фактот дека препорака постои. Европската унија очигледно добро ги одмерила реалните состојби со капацитетот на нашата држава за почеток на преговори за полноправно членство. Начинот и методологијата како е изработен и презентиран Извештајот како документ не е различен од претходните години. Така беше и минатата година, годините претходно, така е и сега. Има елементи кои се пофалени и означени како навистина напредни, но има и теми за кои Европската комисија очекува поголем ангажман од страна на домашните институции, но и на сите политички субјекти и општествени чинители, прецизира Димовски.
Се надеваме, нагласи, дека СДСМ и нивното раководство ќе научат дека со напад спрема својата држава не можат да успеат во својата желба за враќање на власт.
– Оваа препорака е јасен показател дека стандардите во Македонија се на нивото потребно за почеток на преговорите, инаку би немале препорака, ако е се црно како што вели СДСМ. Препораката не е ниту условена, како што опозицијата со своите медиуми, сакаше да конструира и да претстави во обид да превенира да биде толкувана како шамар за раководството на СДСМ, посочи Димовски.
За нас, додаде, е посебно значајно што Европската унија нотира голем напредок во економијата и прогрес во правосудството и јавната администрација, како и борбата против организираниот криминал.
– Изразуваме надеж дека Унијата ќе успее да најде начин, со силна поддршка од наша страна да се стави крај на ќор-сокакот, наметнат од една од членките на Унијата, како што и самите велат. ВМРО-ДПМНЕ смета дека е потребен континуитет на високиот дијалог помеѓу Република Македонија и Евроспката унија. Потребен е повисок фокус на Европската комисија кон Македонија, бидејќи членството на нашата држава во Унијата е стратешка определба, потенцира Димовски.