Осветлувањето на едната страна од коритото на реката Црн Дрим во Струга, кое општината свечено го откри минатиот месец, не работи. Светлата во неколку бои се вклучени, но не светат. Ова се случува втор ден по ред. Не се знае дали станува збор за дефект, но тие се под десетгодишна гаранција.
Пред повеќе од еден месец, струшкиот градоначамик Рамиз Мерко со спектакуларен огномет, пренос во живо, снимки од дронови, свечено го пушти во употреба осветлувањето на реката.
За него се потрошија близу 110 илјади евра. Должината на осветлувањето, според објавата на Општина Струга, е 1800 метри. Биологот Кирил Арсовски – Пржо, кој се занимава со истражувања на националниот биодиверзитет и урбаната екологија, осветлувањето го опиша како естетски одвратно и штетно за живиот свет.
Според склучениот договор меѓу Општина Струга и струшката фирма „Те-џи бм електрик“, која победи на тендер, градоначалникот Мерко треба да ѝ исплати 109.979 евра.