Техничкиот премиер, Оливер Спасовски, вчерашните предвремени парламентарни избори ги опиша како кристално чисти, фер и демократски.
„Изборот е направен, насоката е потврдена, Северна Македонија продолжува на правиот пат во сигурна и европска иднина“, рече Спасовски во владиниот прес центар.
Тој истакна дека Државната изборна комисија е должна да излезе на прес конференција и да ги соопшти резултатите.
„Упатувам благодарност до институциите вклучени во организацијата и спроведувањето на изборите. Посебно упатувам благодарност до Комисијата за заразни болести за успешно донесените избори за заштита на јавното здравје“, рече тој.
Според Спасовски, победник на вчерашните избори е секој гласач, а нашата земја докажала дека е заслужено членка на НАТО.
На новинарското прашање, дали СДСМ ќе коалицира со ДУИ, Спасовски одговори дека тоа е прашање кое што треба да биде упатено до партијата.
„Тоа е прашање на политички проценки и политички договарања. Се што е потребно да се направи за доброто на државата и граѓаните, мора да се направи во наредниот период, да докажеме дека интересот на граѓаните е во прв план“, рече Спасовски.