Пукната топловодна цевка утрово предизвика поплавување на првиот кат од зградата на поранешно НИП „Нова Македонија“, каде се сместени повеќе државни институции.
Поради навлегувањето вода и ризикот од оштетување на електричните инсталации, од безбедносни причини е исклучена електричната енергија во целиот објект.
Поради прекинот на струјата, не работат лифтовите, компјутерските системи и серверите, што го отежнува функционирањето на институциите сместени во зградата.
На терен се ангажирани технички екипи кои работат на испумпување на водата, отстранување на последиците и санација на дефектот.
Според првичните проценки, можно е објектот да остане без електрична енергија и во наредните денови, во зависност од степенот на оштетувањата и времето потребно за безбедно повторно активирање на електричната мрежа.
Во објектот се сместени повеќе институции, меѓу кои Министерството за образование и наука, Државниот просветен инспекторат, Државната изборна комисија, делови од Министерството за економија и труд, како и други агенции и управи.