Разрешената обвинителка Вилма Русковска пред еден месец во интервју на А1он кажа дека очекува да биде разрешена од обвинителската позиција, согласно информациите кои ги добила. Дали имало притисоци за тоа, кажа дека не знаела.
„Очекувам советот да донесе одлука за мое разрешување. Така се зборува и такви информации имам добиено. Не знам, навистина не знам дали има притисок и од каде е“, рече Русковска за А1он.
Денеска пак, членовите на Советот на јавните обвинители едногласно ја разрешија поранешната шефица на Јавното обвинителство за гонење на организиран криминал и корупција Вилма Русковска од функцијата јавен обвинител, а беше донесена и одлука за намалување на платата на обвинителката Ивана Трајчева за 30 проценти во траење од шест месеци.
Против Русковска и обвинителките Трајчева и Елизабета Јосифоска беше отворена дисциплинска постапка поради претресот во просторите на Управата за финансиска полиција летото 2022 година, додека директор на оваа институција беше Арафат Муареми.