Албанскиот премиер Еди Рама на Бледскиот стратешки форум му се обрати на бугарскиот претседател Румен Радев, велејќи му „Одблокирајте го патот“.
Неговите зборови се однесуваат на бугарската блокада на преговорите за членството на Македонија во Европската Унија.
„Ве молам, вие Бугарите не бидете чисти европјани, бидете балканци. Отворете го патот, отворете го патот. Што се обидувате да спасите таму? Отворете го патот за разговори, а потоа пак блокирајте како вистински балканци“, рече Рама.
Тој своето мислење за идните проширувања на Европската Унија го кажа преку виц.
„Некој сретнал ЕУ оптимист и ЕУ песимист. Го прашал ЕУ оптимистот што мисли за проширувањето, а тој му одговорил дека Турција ќе влезе во ЕУ или за време на северномакедонското или албанското претседателство. Потоа ЕУ песимистот на истото прашање одговорил дека и Македонија и Албанија ќе влезат во ЕУ за време на турското претседателство“, рече Рама.
На годинешниот Бледски стратешки форум во Словенија, учествуваат многу шефови на држави и влади од регионот и Европа, официјални највисоки претставници на институциите на ЕУ, како и на повеќе меѓународни и тинк-тенк организации.