Поради финансиски проблеми во прашање е доведено натамошното постоење на весникот „Илинден“ единствениот печатен медиум на македонски јазик во Албанија.
– По четири години постоење, поради финансиски проблеми, во прашање се доведува натамошното печатење на весникот, кој е единствен печатен медиум што информира за Македонците во Албанија, за нивниот живот и проблеми со кои се соочуваат, нивната култура, обичаи и традиција, вели Никола Ѓурѓај, главен и одговорен уредник на весникот.
Првпат весникот „Илинден“ на истоименото македонско друштво со седиште во Тирана, беше испечатен во 2010 година, како двоброј за март и април. Неговата мисија, според Ѓурѓај, е да го одржува и поттикнува македонскиот идентитет во Република Албанија, преку културен израз и во целост ја остварувавме.
– Во изминатите четири години предизвика голем интерес кај читателската публика во Албанија и прерасна во медиум кој е интересен и корисен за македонското малцинство во Република Албанија. Верувавме дека ваквата активност ќе биде соодветно поддржана од државните институции како во Република Албанија така и во Република Македонија, но и од Македонците ширум светот, но ете сме доведени до свршен чин, додава Ѓурѓај.
Поаѓајќи од досегашното искуство, нагласува Ѓурѓај, кога земјата во која живеат и се лојални граѓани и ги плаќаат даноците не издвоила ни пара за весникот, веруваат дека тоа ќе го стори нивната матична земја, Македонија, но и Македонците каде и да живеат и оти „Илинден“ и понатаму ќе се печати и ќе ги радува Македонците со многу вести, репортажи, интервјуа…