Првата пратка од вакцините против Ковид-19 кои земјава ќе ги добие од Србија ќе пристигне утре информираат од Министерството за здравство. Вакцините на граничниот премин Табановце на премиерот Зоран Заев ќе му ги предаде претседателот на Србија Александар Вучиќ.
„ Ве известуваме дека утре, 14.02.2021 година (недела), во 10:00 часот изутрина на граничниот премин Табановце ќе пристигне првата пратка на вакцини од Република Србија. На примопредавањето ќе учествува делегација од Република Србија предводена од претседателот Александар Вучиќ, а негов домаќин ќе биде премиерот Зоран Заев“ – стои во соопштението.
Како што најави Заев во првата пратка од вакцините на Фајзер од Србија ќе добиеме половина од договорените 8000 дози. Првично предавањето на вакцините беше закажано за четвртокот, но имаше одложување поради како што објаснија двете страни „комплетирање на техничката документација“.