Српскиот претседател Александар Вучиќ денес изјави дека на територијата на општина Кањижа се пронајдени два големи пакети експлозиви со фитили, нагласувајќи дека навремената реакција на српските вооружени сили спречила сериозна акција насочена против виталните интереси на државата, пред сè против клучната гасна инфраструктура што ги поврзува Србија и Унгарија.
За време на обиколката на градилиштето за проектот Експо 2027 во Сурчин, Вучиќ рече дека веќе разговарал за случајот со унгарскиот премиер Виктор Орбан, кого го информирал за првите резултати од истрагата на српските воени и полициски власти. Според него, доколку планираната саботажа успеела, последиците би биле далекусежни – и северна Србија и Унгарија би останале без гас.
„Пронајдени се два ранци, односно два големи пакети експлозиви со фитили. Имаме и други траги што се пронајдени за време на истрагата. Доколку имало прекин во снабдувањето, Унгарија немаше да има гас, а немаше ниту ние во северна Србија“, рече Вучиќ.