Шведското радио објави подолга репортажа посветена на актуелната општествена и политичка ситуација во Македонија, вклучувајќи го и проектот „Скопје 2014“.
Во репортажата, која е подготвена во рамките на серијата на Шведското радио под заеднички наслов „Конфликт“, е објавено и интервју со шведскиот амбасадор во Македонија Ларс Вахлунд.
Интервјуто, како што се посочува на веб-сајтот на Шведското радио, е направено во контекстот на декемвриските настани во македонското Собрание и заострувањето на тензиите меѓу Владата и опозицијата.
Декемвриските настани во Парламентот, како што се истакнува, добија голем публицитет, при што претставници на повеќе земји-членки на ЕУ почнаа да ја оспоруваат зрелоста на земјата за започнување на пристапни преговори околу членството во ЕУ.
– Македонија сега е соочена со големи и тешки предизвици. Тоа што се случи во Парламентот создаде внатрешни проблеми и ја зајакна критиката против земјата, при што од повеќе места се апелираше на Македонија да ги реши овие проблеми. Останува да се види дали земјата е способна да оди понатаму и можеби да се доближи до отворање на преговорите за членство во јуни, вели шведскиот амбасадор Ларс Вахлунд.
Според негово мислење, критиката не доаѓа најмногу од страна на најмоќните членки на ЕУ како Германија, која застана зад мислењето на ЕУ-комисијата во однос на Македонија.
– Водата на својата воденица посебно ја наведуваат соседните земји, сега велејќи дека ова не е само проблем со името, во оваа земја има други проблеми, вели Вахлунд.
Шведскиот амбасадор потенцира дека неговата земја, и ЕУ во целина, се обидуваат помогнат во решавањето на проблемите во Македонија така што ќе го покренат процесот кој ќе значи почнување на преговрите, а што не е иста работа кога станува збор да се биде членка на ЕУ.
– Земете го примерот на Хрватска, на која и беа потребни осум, можеби 12 години да ги заврши преговорите за членство во ЕУ. Но најдобро е да се започне процесот на прегови и да се направи обид да се реформира земјата. Тоа е најдобро за самата земја, тоа е добро за ЕУ, потенцира Ларс Вахлунд.
Многумина во Македонија, и пошироко во регионот, вели амабасдорот Вахлун, не веруваат во еден таков долг процес кој подразбира спроведување на темелни реформи, и сметаат дека приемот во членството на ЕУ е можно преку некаков вид политичка спогодба, со политичка одлука преку ноќ, но стварноста во денешниве услови е сосема поинаква.