И Обединетата македонска дијаспора му ја честиташе победата на претседателот Барак Обама.
Томи Танеф, угледен македонски адвокат од Охајо, вели дека Ромни ќе биде подобар за заштита на интересите на Република Македонија.
„Тука, Грците се подобро поврзани со демократите, а Македонците се со републиканците“, вели Танеф.
Тој изјави дека Македонците од Охајо главно гласале за Ромни не само поради очекуваната поголема поддршка за Македонија, туку и поради неговата економска политика.
„Мислам дека неговата победа нема да биде позитивна за бизнисот, Македонците кои се во Охајо се главно мали стопанственици, имаат свои бизниси и сега може да очекуваме да плаќаме повисоки стапки на данок. Постои страв да инвестираме бидејќи не знаеме што да очекуваме сега. Берзата веднаш падна по изборот на Обама, земјата е задолжена со 16 трилиони долари и тоа не може да продолжи без крај“, вели Танеф.
Од другата страна, во коментарите на претставниците на грчката заедница во САД, се поздравува пред се изборот на сенаторот Боб Менендез од Њу Џерси, кого грчката организација ХАЛЦ го оценува како незаменлив во застапувањето на грчките ставови во Сенатот. Иако пред самите избори беше вмешан во секс скандал, Менендез, кој е Кубанец по потекло, победи во трката против републикански кандидат кој, пак, имаше грчко-либанско потекло. ХАЛЦ сепак заклучува дека Сенатот, по 30 години, е без етнички Грк во својот состав, со повлекувањето на сенаторката од Мејн Олимпија Сноу.