Кривичниот суд во Скопје на главната расправа почна со сослушување на сведоците во случајот „Тврдина 2“ за незаконско уништување на опремата за прислушување, во кој првообвинет е еск-шефот на УБК, Горан Грујевски кој е во бегство.
Сведок вработен во МВР, тврди дека денот кога било закажано уништувањето на документацијата, лично му се јавил Горан Грујевски да присуствува на чинот. На директното испрашување, обвинителката Ленче Ристовска го праша сведокот кога точно се случил настанот, а тој одговори дека тоа се случило во 2015. година, но не можеше да се сети на датумот.
Тој потврди дека уништувањето на документацијата било во базата Брест, како и многу слични уништувања кои се случувале и претходно. Она на што се сеќава е дека близу до него имало канистер со вода и противпожарен апарат.
Сведокот вели дека ги познава обвинетите како колеги и дека биле присутни дел од нив на денот кога била уништена опремата.
Другиот сведок исто така вработен во МВР одби да сведочи пред судот, бидејќи и е син на една од обвинетите. И двајцата се вработени во МВР. Според Законот за кривична постапка, сведокот кој е во крвно сродство со обвинет има право да не даде исказ.
Судијката Лидија Петровска праша дали има уште некој од сведоците кој што е во роднинска врска со обвинетите.
Судот даде пауза по што продолжува директното испрашување на третиот сведок повикан од СЈО.