По паузата продолжи судењето за случајот „Тврдина 2“ во кој беше сослушан третиот сведок вработен во МВР. На прашањето на обвинителката Ленче Ристоска, третиот сведок вработен во МВР потврди дека учествувал на две постапки каде биле уништувани документации.
– Беше обичен ден. Околу 10 часот ми се јави Ванчо Цветановски или началникот Никола Бошковски, не се сеќавам, и ми кажа да земам две возила и да ги донесам пред Одделот за оперативна техника на МВР“, изјави третиот сведок за денот кога била уништена документацијата за прислушувањето.
Сведокот појасни дека во возилата товареле црни кеси со документација за ништење и ги однеле за Петровец. На уништувањето на документацијата присуствувале сите од надлежната комисија при УБК.
На прашање на адвокатот Љупчо Шврговски да објасни описно каков бил просторот во кој се вршело ништењето, сведокот изјави: „Просторот беше ограден со камења, во кружен облик од околу три метри. Мислам дека имаше и противпожарен апарат“.
Сведокот изјави дека ова ништење на документацијата било различно од првото на коешто присуствувал бидејќи во првиот случај станувало збор за ситни белешки, а тој воопшто не знае какви документи има во црните кеси.
На прашање на судот дали обвинетите службенички во УБК се виновни, сите шест се изјаснија дека не се чувствуваат виновни.
Јавноста повторно е исклучена од судењето бидејќи пред судот се изведуваат класифицирани документи од УБК.