Во постојана координација сме со екипите на БЕГ, се работи интензивно на терен за итно отстранување на дефектот и во рок од два дена, односно во петок, студентите сместени во студентскиот дом „Стив Наумов“ ќе имаат и топла вода и парно греење, информираат од Државниот студентски дом Скопје.
-Во моментов се работи на санирање на наследената катастрофална состојба во домовите и на замена на дотраената и стара опрема, а истовремено се исплатени и обврски во висина од два милиони евра од вкупно наследениот долг од пет милиони евра. Ги уверуваме студентите дека ќе се решат наследените проблеми во студентските домовите кои се затекнати во катастрофална состојба, а условите за живот и учење во студентските домови ќе продолжат да се подобруваат, соопшти Државниот студентски дом Скопје.
Во последна фаза, се вели во соопштението, е воведување на новото мени по повеќе од 15-тина години со што значително ќе се подобри исхраната која е голем проблем за студентите. Наскоро ќе почне реновирање на кујната во „Гоце Делчев“, реконструкција на покривите во „Стив Наумов”, поставување видео надзор за обезбедување поголема безбедност на студентите, подобрување на квалитетот на храната, и реализација на јавни набавки каде за разлика од минатото се бара исполнување на највисоките ISO и хасап стандарди.
Поради дефект на внатрешната инсталација во Студентскиот дом „Стив Наумов“ во една од вкупно четирите згради нема топла вода, а во две згради нема парно греење.