Претседателот на Демократската Унија за Интеграција (ДУИ), Али Ахмети, во седиштето на партијата во Тетово денеска се сретна со Питер Дју, претставникот на Генералниот Секретар на ОН за Балканот.
Како што соопшти ДУИ, Ахмети и Дју разговарале за состојбите во регионот, политичката ситуација во земјата, интеграцијата на Македонија во НАТО и во ЕУ.
На средбата Ахмети се фокусирал на улогата на ОН и на посредникот Метју Нимиц за решавање на прашањето за името меѓу Македонија и Грција.
– Овој проблем го држи Скопје далеку од Брисел и ја гуши нашата Евроатлантска перспектива која поттикнува незадоволство и очај кај нашите граѓани, рекол Ахмети, соопшти ДУИ.
Тој ја истакнал потребата за поизразена и честа активност на ОН бидејќи, посочил, проблемот се решава со проактивен и интензивен пристап и затоа и го замолил Дју да му ги пренесе овие ставови и на Генералниот секретар на ОН.
Ахмети говорел и за потребата за зголемена подготвеност во Скопје и во Атина за дијалог што ќе овозможи членство на Македонија во НАТО, а потоа, процесот на интеграција во Европската Унија ќе продолжи според исполнувањето на критериумите.
Ахмети и Дју разговарале и за случајот „Монструм“, при што било повторено барањето за транспарентност и кредибилитет на процесот како и меѓународно следење на постапките и доказите.