Претседателот на Собранието на Република Македонија, Талат Џафери, експресно ја потпиша одлуката за разрешување на Катица Јанева, која пратениците ја донесоа со 102 гласа „ЗА“ и ниту еден против.
Одлуката веднаш е испратена до Советот на јавни обвинители, кој според информации на А1он вечерва ќе се состане да ја донесе конечната одлука. На седницата, најверојатно ќе се расправа и за обвинителите од СЈО, на кои со разрешувањето на Јанева им престанува и мандатот во СЈО.
Според Законот со кое беше формирано обвинителството тие треба, од Советот да бидат распределени во матичните обвинителства. Јавниот обвинител Љубомир Јовески, вчера изјави, дека не е исклучена можноста, вака распределените обвинители, да ги овласти да постапуваат по предметите кои и до сега ги воделе. Ова е заради опасноста, со назначување нови обвинители, постапката да се одолговлечи, а некои предмети и да застарат.