Скопје Сити Мол, по јавно изнесените обвинувања од страна на фирмата Лендсервис, која ја одржуваше хигиената во трговскиот центар, во целост ги отфрла тврдењата на Лендсервис дека од страна на Скопје Сити Мол е направена каква било дискриминација на нивни вработени, а посебно не дискриминација по национална основа, врз припадниците на ромската националност.
Вистинската причина заради која Лендсервис во јавноста ги пласира овие лажни конструкции лежи во фактот што Скопје Сити Мол ја прекина соработката со оваа компанија. Поради исклучително нискиот квалитет на нивните услуги и бројните поплаки од посетителите и закупците на Скопје Сити Мол, соработката е прекината и на нејзино место е ангажирана друга компанија. Злонамерните и лажни обвинувања доаѓаат веднаш откако беше прекината соработката заради неквалитетните услуги на Лендсервис, велат од трговскиот центар.
Скопје Сити Мол, согласно својата организациска поставеност, е еклатантен пример на мултинационален комерцијален проект. Во трговскиот центар Скопје Сити Мол работат припадници на многу националности, не само од Република Македонија, туку и од други држави од Балканот. Со ова, уште еднаш потенцираме, дека ваквите обвинувања се целосно неосновани и лажни. За да го заштити својот углед, Скопје Сити Мол е принуден да поднесе тужба против фирмата Лендсервис и сите кои на овој начин го рушат угледот на компанијата. Апелираме до јавноста да не наседнува на ваков вид на провокации и ширење на невистини кои се изнесени од приватна фирма исклучиво за остварување на нејзини бизнис интереси, стои во реакцијата.