И денеска народните избраници ја продолжуваат дебатата за проектот „Скопје 2014-та“. Опозицијата и власта имаат дијаметрално спротивни ставови и за оправданоста, и за потрошените пари, но и за естетскиот изглед. Токму затоа вчера од говорницата се слушнаа многу навреди, а во салата кавги и дофрлувања.
За опозицијата, „Скопје 2014“ е забеган и криминален проект кој не дели етнички и религиски, смислен проект за перење пари и уништување на македонскиот идентитет.
Овој проект велат, ги уништува темелите на македонската државност и штетите од него допрва ќе се почувствуваат.
Посочувајчи ја анкета на агенцијата„ Рејтинг“, во која дури 81,8% од македонските граѓани сакаат веднаш да запре изградбата на спомениците, од СДСМ велат дека проектот е криминален поради расипничкото трошење на народни пари.
За власта, пак, новите споменици само го разубавија градот Скопје и со тоа ќе имаме добивка бидејќи ќе привлече многу туристи.
Не можат да сфатат зошто ова и пречи на опозицијата. За ВМРО-ДПМНЕ овој проект е аманет за идните генерации.
За ДПА главен виновник за проектот „Скопје 2014“ е ДУИ.
ДУИ пак главно ја премолчеа расправата. Единствено реагираа, кога од СДСМ посочија на нив како на виновници и соучесници, бидејќи одобрувале се, што ќе зацртаат во ВМРО-ДПМНЕ.