Штипската винарија „Имако“ со откупот на грозје стартува од сабота. Директорот на производството во „Имако“, Атанас Рунчев вели дека откупот го почнуваат со шардоне, а годинава ќе откупат околу 10 милиони килограми грозје.
Откупот се одвива во еднаков сооднос меѓу бело и црвено грзје. Првите количества пристигнуваат од Тиквешијата, а потоа следи бербата и откупот од штипскиот регион. Рунчев очекува квалитетот да биде добар, а приносите просечни.
– Нашите агрономи се на терен, сега за сега проценките се добри, малку сушата ни претставува проблем, но се надевам оние што имаат наводнување дека квалитетот ќе успеат да го задржат, вели Рунчев.
Тој додава дека во винаријата 70 отсто од грозјето е од нивните плантажи и кооперантни од штипскиот регион, додека останатите 30 отсто се обезбедуваат преку откупните пунктови во винарските региони.
Рунчев истакна дека лозарството пополека се враќа во штипскиот регион, како винарија веќе планираат нови насади на над 100 хекатри. На новите плантажи ќе се насадат и стари, но и нови сорти на грозје. Во штипскиот регион под лозови насади има околу 500 хектари, а грозјето го откупуваат три винарии. Годинава се очекува да откупат околу 25 милиони килограми грозје.