Седумдесет и три години од ослободувањето од фашистичката окупација, одбележува денеска Кавадарци. Чествувањето на празникот започна со положување цвеќе пред споменикот на паднатите борци на градскиот плоштад.
– Градот е ослободен од борците на деветтата Македонска народно-ослободителна бригада, на чие чело се наоѓал командантот Најдо Стаменин-Орлов. По ослободувањето, бил организиран митинг на кој присуствувало речиси целото население на Кавадарци. Говорел и политичкиот комесар на оваа бригада Ристо Стојанов-Железни, а била организирана и општонародна прослава, потсети историчарот Петре Камчевски во изјава за медиумите.
Тој нагласи дека слободата на Кавадарци била многу скапо платена.
– Во текот на НОВ и Револуцијата 1941-1945 година од Кавадарци загинале вкупно 333 борци. Тројца од нив се прогласени за народни херои, рече Камчевски, кој е директор на кавадаречкиот музеј.
