Скопското обвинителство води предистражна постапка за обвинителот Бурим Рустеми, посочија оттаму за „А1он“. Според нив, веќе е направен и распит на адвокатот Мерџан Даути, бранител во случајот „ТНТ“ и подносител на кривичната пријава. Детали не се откриваат, за тоа, што стои во неа. Неофицијално, поврзана е со сопрена истрага од Рустеми која се водела против Ардијан Амозски, сопственик и управител на „Фине ДОО“ фирма која го гради комплексот „Космос“.
„Предметот за кој покажувате интерес е во фаза на предистражна постапка. Кривичната пријава до Основното јавно обвинителство Скопје е поднесена кон крајот на септември и надлежен јавен обвинител постапува за проверка на наводите во пријавата. Со таа цел извршен е распит на подносителот на пријавата. По утврдување на фактите, ќе биде донесена јавнообвинителска одлука“, велат од Обвинителството за „А1он“.
Предметот кој го води Обвинителството е една од причината поради што е побарано изземање на обвинителот Бурим Рустеми во случајот „ТНТ“. Обвинетата Елисавета Најдовска му посочи на Обвинителството и Кривичниот суд дека против Рустеми се води постапка. За Кривичниот суд и судијата Огнен Ставрев, таа наведува дека постапува по желбите на Рустеми и ги прифаќа само доказите кои обвинителот ги смета за важни.
Судот, одлучи да го одбие барањето за изземање на обвинителот Бурим Рустеми.