Кривичниот суд во Скопје даде пауза до 10:30 часот за судењето за предметот „Насилство во Центар“ за да се одлучи по барањето за изземање на претседателот и потпретседателот на Кривичниот суд, Иван Џолев и Пајазит Пајазити, како и за в.д. претседателот и неговиот заменик на Апелацискиот суд, и за судечкиот судија Душан Јосифов, поднесено од адвокатот Боро Тасевски непосредно пред почетокот на судењето.
Барањето е поднесено поради изјавата на јавната обвинителка Катица Јанева дека одредени судии се опфатени во прислушуваните разговори.
Обвинителката Фатиме Фетаи, побара да биде донесено решение за отфрлање на барањето како неосновано, бидејќи, како што кажа, за претседателот на судот Џолев и неговиот заменик неможе да се бара изземање доколку не се судии во процесот. Побара отфрлање и набарањето за изземање на в.д. претседтелот на Апелација и неговиот заменик бидејќи, рече, предметот не се наоѓа во фаза на одлучување пред Апелацискиот суд.
На рочиштето на кое исказ треба да дадат двајца сведоци, присуствуваат сите обвинети, нивните бранители со исклучок на Милан Андонов и Митко Печков, кои се адвокати на Никола Груевски и Миле Јанакиески.
Обвинетите во овој случај, поранешниот премиер Никола Груевски, поранешниот министер за транспорт и врски Миле Јанакиески, пратеничката на ВМРО-ДПМНЕ Даниела Рангелова и уште девет лица пред Судот се изјаснија дека не се чувствуваат виновни.
На претходните рочишта за овој предмет, вина признаа четвртообвинетиот Томислав Лазаров и петообвинетиот Јордан Ристевски и добија условни казни.
Обвинетите во предметот „Насилство во Центар“ се товарат за поттикнување на насилството што се случи при протестите пред општина Центар во јуни 2013 година.