СДСМ објави отворен повик за самокандидирање на кандидати за претстојните претседателски избори.
Во огласот се наведени четири критериуми кои се бараат од кандидатите: да е личност со висок општествен углед, да биде способен за извршување високи државнички функции, да ужива доверба на членството и симпатизерите на СДСМ, како и да биде личност која на најдобар начин ќе ја оживотворува политиката на СДСМ и ќе работи на реализација на стратешките приоритети на Република Македонија – полноправно членство во НАТО и ЕУ, како и меѓународна афирмација и промоција на Република Македонија.
Рокот за пријавување на кандидатите е до 19 февруари, кои своите апликации треба да ги достават до Извршниот одбор на партијата.
Одлуката за објавување на повикот за кандидирање била донесена на последната седница на Централниот одбор на СДСМ кога најавија дека до крајот на неделата ќе се одржи и седница на Извршниот одбор за да се донесе конечна одлука дали ќе има предвремени парламентарни избори заедно со претседателските, како што бара ВМРО-ДПМНЕ.
Од СДСМ најавија дека името на кандидатот за претседател ќе го објават на 3 март, а неофицијално во јавноста веќе се вртат имињата на министрите Оливер Спасовски, Радмила Шеќеринска, Никола Димитров и на националниот координатор за НАТО, Стево Пендаровски.
Галена Николовска-Ризвановиќ